Šibenskin ulicami odzvanja dečji smeh, a glavna tema razgovora više nisu Facebook i videoigrice leh predstavi. Tako se odgaja buduća kazališna publika, dok se va radionicami razvija dečja kreativnost i jubav prama različitin oblicimi umjetnosti. Šibenik z pravon nosi titulu grada prijatelja dece, našeh budućeh veleh judi ki bi mogli bit bolji da va sebe zavavik zadrže dečji duh.
Na ulazu v Riku, tamo pul Plumbuma, piše da j' Rika grad prijatelj dece. Često razbijan glavu z ten je to jušto tako. V Rike se najveć dece more videt va Toweru na Pećinami, kako se igraju va onen kantuniću dok su njin roditelji va šopingu.
Naš grad nima ni baš puno parki i igrališta va ken bi se deca mogla igrat. Tu i tamo dogode se neki programi za dečju publiku. Ma se to skupa nekako se teško more usporedit z jednin Šibenikon, ki već više od pedeset let imeje Međunarodni dečji festival. Kad san bila mića, na televizije su prenosili neke predstavi ke su se odvijale spred stare šibenske gracke vijećnice. Volela san to pogljedat, ma se do sad nis imela prilike poć va Šibenik va vrime dečjeg festivala. Tih petnajst dan ča festival dura, Šibenik va praven smislu te besedi postaje grad diteta. Ne moren se spametit kad sad zadnji put va tako kratko vrime videla tuliko miće dece po ulicami, trgimi i najveć va teatru. Parter i loži šibenskog kazališta oveh dan krcati su mićeh gledatelji, ke roditelji va velon broju vode na predstavi. Po šibenskin ulicami leh se divani o predstavami, a jedan otac rekal je da j' škoda ča festival ne dura šest miseci na leto. I mići i veli žive z dečjin festivalon. Ono ča j' najlipše, va vrime trajanja manifestacije se kot da j' storeno po dečjoj mere. Na sakon kantunu prodaju se slatkiši, otprt je samanj libri za decu, održavaju se promocije dečjih libri i izložbi z dečjin radimi. Deca Šibenika va velon se broju uključuju i va radionice, a rezultati njihovoga dela moru se videt po celon gradu. Deca sama stvaraju i festivalski bilten, a imeju i svoj radio. Šibenskin ulicami odzvanja dečji smeh, a glavna tema razgovora više nisu Facebook i videoigrice leh predstavi. Tako se odgaja buduća kazališna publika, dok se va radionicami razvija dečja kreativnost i jubav prama različitin oblicimi umjetnosti. Šibenik z pravon nosi titulu grada prijatelja dece, našeh budućeh veleh judi ki bi mogli bit bolji da va sebe zavavik zadrže dečji duh. Šibenik je va ten pogledu svetli primer. O ten je i Rika grad prijatelj dece moglo bi se raspravljat. Leh da se ne ustane na onoj tablice ku su klali na ulazu va grad.Objavljeno: 29.06.2011, 07:50h
